17
Ʋʋ poɛ soa' -wɛe ʋʋ "nyɩ Sosɛu 'a -saa -ju Manase 'a 'blʋa 'a 'blowɔn -nɩ 'a 'kɛn. Manase 'a "i -saa -ju Makii, Galadɩ 'a "bo -nɩa "sooa a, ʋʋ "nyɩɔ Galadɩ ke Basan 'a 'blʋa 'mɛ sese. 2 Manase 'a "nynuʋ nmai nynuu -siae', dɛ -nɩa Abiesɛɛ, Elɛkɩ, Asiriɛ, Sisɛmʋ, Efɛɛ ke Semida ke, Manase 'a "nynuu -ʋʋa "bɛma Sosɛu nɩa 'je ʋʋpʋ 'a -nɩ -gbɛin" 'a 'kɛn 'mɛ.3 Manase 'wlʋɛ Makii, Makii wluɛ Galadɩ, Galadɩ 'wluɛ Efɛɛ, -wɛe Efɛɛ 'wlu Selofadɩ, 'de Selofadɩ se "ju nmɔu ju 'wlʋ, ɔ 'wlʋɛ 'nynʋkpae nynuu 'a 'sʋ -ʋʋa 'nynɩ nɩ: Maala, Noa, Okla, Milɩka ke Tiisa ke; 4 Ʋʋ muɛ 'de 'sraa -sai Eleasa o, Nunɩ 'a "ju Sosue' ke Israɛ -nyʋ 'a 'blʋa 'a 'blowɔn 'ɔ "jrukpɔ i -tenyʋ o, -wɛe ʋʋ wlu ʋʋpʋ -pee ʋʋ 'na: Nyɔsoa 'tmʋʋ Moisɩ 'mɛ ɔ 'je -aa nɩ 'kɛn "nyɩ ka ɔ "nyɩɛ "nynuʋ nmai -wlʋa 'de -aa 'blʋa 'a 'blowɔn 'di ɛ.
Ʋʋa' -nyɩ" ʋʋpʋ 'blʋa 'a 'fɔ -ɛ -jea ʋʋpʋ 'a dɛ 'kpa a ka ʋʋ "nyɩɛ ʋʋa' "bo 'a dedi' nmai -wi", Ka Nyɔsoa "sia ɛɛ' 'nynɩ ɛ. 5 Manase 'a 'blʋa 'a 'blowɔn 'jeɛ 'fɔ -puue, -bo nyʋ se Galadɩ ke Basan blʋa -ɩ -nɩa 'de Sudɛn 'ɛ 'jrʋ 'a 'wlʋʋ 'ɩn fɔo -sro' ɛ. 6 Dɛ -mɛ -sa wɔ mɛ -nɩ ka ʋʋ "nyɩa 'nynʋkpae jrʋ' -nɩa 'de Manase 'a 'blʋa 'a 'blowɔn 'di 'kɛn ɛ, 'kamɔ ʋʋ "nyɩ "nynuʋ nmai nynuu -ke, -wɛe Galadɩ -blʋa nɩ Manase 'a "nynuu -siae' 'a dɛ.
7 Manase 'a 'blʋa 'a 'blowɔn tba 'de Asɛɛ 'de Mikɩmetatɩ, 'de Sisɛmʋ "juɛi. -Wɛe ɛɛ' -paʋn "sii 'de -sɔin' 'de nyʋ -tia" 'de Einɩ Tapua. 8 Tapua blʋa -mɛ nɩɛ Manase 'a dɛ -o, 'kaa ɛɛ' "kwi -kwlɔ -nɩa 'de Manase 'a -paʋn "i ɛ, ɛ nɩɛ Eflaimʋ 'a "nynuu 'a dɛ -o. 9 'De -mɛ de ɛ, ɛɛ' -paʋn "siɛ i 'de Kana -gbuu 'a -cru -cru nʋ na', ɛ jɛɛ nɛ' 'de ɛɛ' 'kpʋʋ -nɩa 'de -sɔn' i fɔo o. Ɩa' "kwi -kwlɔ -tu paa Manase 'a -nɩ 'nynɩ i, 'kaa ɩ nɩɛ Eflaimʋ 'a dɛ -o. Manase nyʋ 'a -paʋn cɛɛn 'de 'kwea 'de "ni 'a -cru -cru nʋ na' -wɛe ɛ "si i 'de 'tɔniɛ -kwli". 10 'Ka ɛ nɩ -wɛe Eflaimʋ 'a 'blʋa "si i 'de -sɔn' i, 'de Manase 'a -nɩ 'blʋa nɩ 'de 'kwea fɔo. 'Tɔniɛ Meditelane' mɛ -nɩ ʋʋpʋ 'a -paʋn 'de 'jrʋ 'a i blʋa' fɔo. 'De 'kwea fɔo ɛ, ɛ bla Asɛɛ 'a 'blʋa 'a 'blowɔn "i ɛ ka Isakaa 'a -nɩ ke.
11 Ʋʋ "nyɩɛ Manase "kwi -kwlɔ -tuu" -tuu 'de Asɛɛ ke Isakaa 'a 'blʋa 'di: Bɛtɩ Sean ke "kwi -kwlɔ ɛ 'blea o, Jibleamʋ ke "kwi -kwlɔ ɛ 'blea o, ɛ ke Dɔɔ o, Einɩ Dɔɔ o, Tanakɩ o, Mekido ke ɛɛ' 'di nyʋ ke ɛɛ' "kwi -kwlɔ ɛ 'blea o, -ɩ -nɩa 'blʋa 'a 'fɔ taan a. 12 'Kaa Manase 'a "nynuu se "kwi -kwlɔ -nɩa 'mʋa- -wee' "duo, Kanaa nyʋ "tiiɛ 'de ʋʋpʋ "kwlu -sɩan ke. 13 -Ta Israɛ -nyʋ 'a "i kmaa' 'kpaa "kpei ɛ, ʋʋ se Kanaa nyʋ i -sa, 'kaa "plɔɔ dbo 'a 'sʋ mɛ ʋʋpʋ a nʋ.
14 Nyʋ -a "bɛma Sosɛu nɩa jiɛ Sosue' "kuan poa' ʋʋ 'na: Dɛɛ -tɩ -ɩn -po' soa' -wɛe -ɩn -nyɩ" -aʋn 'blʋa 'a tɔo -ɛ -je -aa 'kɛn nɩ, 'de -mɛ Nyɔsoa po -aʋn "diwan ɛ je -sɩan jɛɛ -a je "i -tie ɛ-? 15 Sosue' -sɛ "kpei ka 'de ʋʋpʋ -pee ɔ 'na: -Bo ao -tie "i mɔ 'de ɛ, -bo Eflaimʋ 'a 'blʋa -nɩa 'de crʋ 'dii se aopʋ "wɔin 'bɛɛ mɔ 'de ɛ, ao mu dɛkpɔ 'beɛ 'de Felesi nyʋ ke Refai nyʋ 'a 'kwlae 'di
16 Nyʋ -a "bɛma Sosɛu nɩa -sɛ "kpei ʋʋ 'na: Tɔ' -tɩ -o, 'blʋa -nɩa crʋ 'dii se -a "wɛin 'bɛɛ-, 'kaa Kanaa nyʋ -tia" 'de Bɛtɩ Sean 'a wlao 'di ke "kwi -kwlɔ -nɩɛ 'dei ke, ɛ ke -jɩ -nɩa 'de Jisɩreɛlɩ 'a wlao 'di, 'bleɛ tʋ -fʋn -wocro' -jiia nɩɛ wɔin ɛ.
17 'Sʋ Sosue' -sɛ "kpei ka 'de Nyʋ -ʋʋa "bɛma Sosɛu nɩa -wɛe -ʋʋ -nɩa Manase ke Eflaimʋ 'a "nynuu -pee ɔ 'na: Aoa' nyʋ tu -tiɛi" -wɛe ao kma "i, ɛ mɛ -tɩ ao se 'blʋa 'a 'fɔ due' 'a 'sʋ 'jei. 18 Aoa muɛ 'blʋa 'a 'fɔ -nɩa 'de crʋ 'dii -ɛ -nɩa 'kwlae 'a 'sʋ 'blea ao 'jeɛ 'beɛ -wɛe ao 'jee -ta ɛɛ' -paʋn -tea i -wee' "kpei -te. -Bo kanaa nyʋ 'ble ʋa' tʋ -fɔn wocro' -wɛe ʋʋ kma "i mɛ 'deɛ aoa muɛ ʋʋpʋ i nʋ a